�

هيجران بير طرفدن، من بير طرفدن

سه شنبه 23 اسفند 1390

مئيليمي سنين تك گؤزله سالديم
غونچايديم آچماميش سولدوم-سارالديم
بير گؤر من يازيغي نه گونه قالديم
هيجران بير طرفدن، سن بير طرفدن

عئشقين سويوق سويو قاتدي آشيما
باخيب رحم ائتمه دين جاوان ياشيما
اوجا بير داغ ايديم دؤيدو باشيما
دومان بير طرفدن، چن بير طرفدن

شيطانين ايشلري فنددي، كلك دي
ائويمي ييخانلار آرزو-ديلك دي
دونيا بير غريبه چرخ فلك دي
فيرلان بير طرفدن، ان بير طرفدن

دونياني گؤرمه ديم قاريخا، چاشا
آي آراز عؤمرونو سئوگي‏يله ياشا
گيرميشم اؤزومله آخير ساواشا
زامان بير طرفدن، من بير طرفدن 

     بؤلوم :            یازار : روستم فرزانه           4 باخیش

بو گئجه من اؤله ‏جم

سه شنبه 2 اسفند 1390

بو گئجه من اؤله‏ جم، قالمياجام صاباحا.

بئله هيجران گئجه ‏سي گؤرميه‏ جم بير داها.

سني بو گون‏دن بري تاپشيريرام آللاها،

گون گله‏ جك غرورون گؤزلريندن آخاجاق،

منه بو ائتديكلرين سنه چوخا باخاجاق.

 

صاباحا دك جوجرر مزاريمين باش داشي،

قال ياشا سن دونيادا ايبليس‏لرله ياناشي.

نانجيبين اؤنونده تؤكدوغون او گؤز ياشي،

مني مزاريمدا دا يانديراجاق-ياخاجاق،

منه بو ائتديكلرين سنه چوخا باخاجاق.

 

بو گئجه من اؤلورم اليم قالير ياخاندا،

ديكسينمه ‏سين گؤزلرين گؤزلريمه باخاندا.

عاصي روحوم سكسه ‏نيب بدنيم‏دن چيخاندا،

بير طوفان قوپاجاقدير، بير ايلديريم شاخاجاق،

منه بو ائتديكلرين سنه چوخا باخاجاق.

 

نه مدت‏دير اوره ‏ييم الينده زيندان چكير،

زلي كيمي بو سئوگي داماريم‏دان قان چكير،

دئميرسن كي بو يازيق نئچه ايلدير جان چكير،

سانيرسان‏مي دؤشونه بيري مئدال تاخاجاق!؟

منه بو ائتديكلرين سنه چوخا باخاجاق.

 

     بؤلوم :            یازار : روستم فرزانه           1 باخیش


  • [ 1 ]
�